Í ár er þess minnst að 100 ár eru liðin frá því bókasafn Frímúrarareglunnar á Íslandi tók til starfa. Í tilefni þessara tímamóta verður húsnæði Frímúrarareglunnar við Bríetartún opið gestum og gangandi milli kl. 11 og 15 á Menningarnótt laugardaginn 24. ágúst. Efnt er til þessa opna húss undir yfirskriftinni Frímúrarareglan söfn og saga. Söfn Reglunnar taka hér höndum saman og sýna ýmsa merka og athygliverða muni, bækur, myndir, skjöl og listaverk sem glatt geta augað og vakið um leið áhuga á merkri sögu reglustarfsins hér á landi. Á sýningunni verður sagan einnig rakin með myndrænum hætti með tímalínu sem sett hefur verið saman fyrir sýninguna. Setur hún starfið í samhengi og er sjónræn leið til að glöggva sig betur á sögu frímúrarastarfs á Íslandi. Frímúrarareglan hefur áður efnt til opins hús í tengslum við Menningarnótt og var það síðast gert árið 2019 í tengslum við að 100 ár voru liðin frá því stúkan Edda varð fullgild St. Jóhannesarstúka innan dönsku Reglunnar.