Okkar eina sanna, Ragnhildur Gísladóttir og Fjallabræðrafaðirinn og tónlistarmaðurinn Halldór Gunnar Pálsson slá lokahljóminn í dagskrá Hörpu á Menningarnótt þegar þau leiða gesti í samsöng.
Þau hafa gaumgæfilega valið bestu blöndu af lögum Röggu og alþýðulögum sem öll þekkja auk þess sem óvæntur smellur úr fortíðinni fær að fljóta með. Textar af lögunum verða aðgengilegir í söngbók sem verður hægt að sækja á vef Hörpu svo gestir geta tekið hraustlega undir af öllum hæðum í alrými Hörpu.