Ragnheiður Ragnarsdóttir opnar sýningu sína: HIMNASENDING í Hannesarholti föstudaginn 30.ágúst kl.15-17. Sýningin er sölusýning og stendur til 17.september. Opnunartími Hannesarholts er alla daga nema sunnudaga og mánudaga kl.11.30-16.00.
Verk Ragnheiðar voru framan af hugmyndaverk, mest innsetningar í rými, unnin í hversdagsleg, handhæg efni, s.s. dagblöð, myndbönd, ljósmyndir og nærtæka muni. Á síðustu árum hefur hún snúið sér aðallega að málverkinu og stöku ljósmyndaverkum. Verkin eru skyld innsetningum að því leyti að eitt verk kallar á annað og mynda þau ákveðið net, þar sem möskvastærð eða bilið á milli eininga er leið til að halda utanum myndflötinn. Verkin leita inn og út fyrir sig og saman tengjast þau í rýminu sem þau eru hluti af. Eldri verk Ragnheiðar mætti kalla tilraun til að kortleggja hversdagslegar athafnir, á meðan nýrri verkin eru laus undan oki skilgreininga. Hér tekur eitt við af öðru. Leitin að hinu óvænta heldur áfram og tilraunir til að fanga örlítið brot af fegurðinni.