Tendrun Friðarsúlunnar

9. október

Ár hvert er Friðarsúlan í Viðey tendruð á afmælisdegi John Lennons, 9. október og lýsir hún upp kvöldhimininn til og með 8. desember en þann dag lést Lennon árið 1980. Þar að auki er Friðarsúlan tendruð frá vetrarsólstöðum til nýárs, í eina viku í kringum vorjafndægur og á sérstökum hátíðardögum sem listamaðurinn Yoko Ono og Reykjavíkurborg koma sér saman um.

Friðarsúlan er hugarfóstur myndlistarmannsins, tónlistarmannsins og friðarsinnans Yoko Ono og er hugsuð sem leiðarljós fyrir heimsfrið.

Verkið er í formi „óskabrunns“, en upp úr honum stígur há og mikil ljóssúla. Orðin „Hugsa sér frið“ eru grafin í brunninn á 24 tungumálum. Ljóssúlan er samansett úr mismunandi geislum sem sameinast í einu sterku ljósi. Sex ljósgeislanna fara lárétt um göng á palli í kringum brunninn og er endurkastað upp á við með speglum. Þéttleiki ljóssins, sem stafar frá súlunni, er háður sífelldum breytingum á ögnum í andrúmsloftinu sem hegða sér í takt við þá margbreytilegu veðráttu sem einkennir Ísland.

„Ég vona að friðarsúlan muni lýsa upp heitar óskir um heimsfrið hvaðanæva að úr veröldinni og veita hvatningu, innblástur og samstöðu í heimi þar sem nú ríkir ótti og ringulreið. Sameinumst um að gera friðsæla veröld að veruleika.“ – Yoko Ono

„Hugsa sér allt fólkið lifa lífinu í friði.“

• John Lennon

Frá því á síðustu öld hefur Yoko Ono safnað óskum fólks hvaðanæva að úr heiminum, sem hluta af venslaverki hennar Óskatré, sem hefur verið sýnt í söfnum og menningarmiðstöðvum víða um heim. Þessar óskir eru geymdar í tímahylkjum við friðarsúlu hennar í Viðey.

Yoko Ono býður þér að bæta við óskum á www.imaginepeace.com eða með því að senda póst til:

IMAGINE PEACE TOWER PO Box 1009 121 Reykjavík Ísland